Rahvastiguregistrin saa võro kiilt imäkeeles märki

9. oktoobril 2025 andsõ Siseministeerium õigusõ märki Rahvastiguregistrin imäkeeles eesti keele mano ka eesti murdõkiili, säälhulgan võro kiilt. Seo muudatusõ elloviimise iist ommaq võrokõsõq ja setoq võidõlnu joba piä 30 aastakka ja seo oll ka üts Võrokõisi I Kongressi otsussist, et Rahvastiguregistrin piät antama võimalus võro keele märkmises uma imäkeeles.

Võro kiilt ei olõ sõski tunnustõt viil eräle keelena, nii et Rahvastiguregistrin lisati tuu variants üten eesti keele murdõkiiliga. Valikun omma lõunaeesti keeleq “Eesti: Võru”, “Eesti: Seto”, “Eesti: Mulgi”, “Eesti: Tartu”, a ka tõsõq põhjaeesti murdõkeeleq nigu lõganuse, saare, kihnu, jõhvi ja tõsõq murdõkeeleq.

Imäkeele andmõq ommaq ütluspõhitsõ ja egä täüsiäline inemine saa noid esi muuta internetin www.rahvastikuregister.ee. Ku tunnõt, et su imäkiil om võro kiil, tuu om sul koton selges saadu, om edimäne kiil, minkän mõtlõt vai ütsindä ollõn kõnõlõt, sis märgiq ka Rahvastiguregistrin umas imäkeeles võro kiil.

Nii om võimalik riigil periselt teedä saia, et võro kiil ja võrokõsõq ommaq olõman ni ku pallo inemiisi võro kiilt kõnõlõs. Nii saa tetäq ka parõmbit otsussit võrokõisi keele ja rahva õiguisi kottalõ, mille iist Võrokõisi Kongress sais.