Võro
Eesti
English
Nursipalu tüükomisjoni kohtumise’ toimusõ’ nii paari kuu takast – kõrd Võrol, kõrd Talinan Kaitsõministeeriumin. Komisjoni kutsõ kokko Võromaa Arõnduskeskus kohalikõ juhtõ soovil, et saanu’ kohalikõ jaost harjutusväljaku arõndamisega seot murõsid viiä otsõ otsustajatõni. Komisjoni tüüst võtva’ ossa Võromaa Arenduskeskus, Võru, Rõugõ, Antsla vallavalitsuisi esindäjä’, Võro liina valitsusõ esindäjä, Võrokõisi Kongressi Vanõmbide Kogo juhi’, MTÜ Nursipalu esindus, Võro Instituudi juht. Inämbüste võtt ossa ka Riigikogo liigõ’ Allasõ Anti, kiä om ka Võrokõisi Kongressi Vanõmbide Kogo liigõ’. Kaitsõministeeriumi puult olli kohal Tiina Uudeberg, Kristi Loit ja Riigi Kaitsõinvesteeringide Keskusõst Elari Kalmaru ja Peeter Karja.
Edimält arutati mürämõõtmisjaamu paigutamist ja tegeliku mürä uurmist. Tuu jääss joba tulõva aasta sisse. Testlaskmisi plaanitas tetä’ K9 kuun miinipildjide, kuulipildjide ja tankitõrje laskmisiga, et saia’ teedä’ mürä tegelikku suurust. Kuuba Rainer ja Tootsi Tiit ütli, et kimmäle piät teedä andma rahvalõ kuupäävä’ ja kutsu inemisi ka uma säädmidega mürrä mõõtma ni ka noid andmid korjama. niisamatõ piät testlaskmise’ võimalikult täpselt perrä tegemä perästist olukorda.
Nursipalu vahtsõnõ tii om joulukuu alostusõst vallalõ, a om selge, et joba inne tii vallalõtegemist om tiitamm silla mant är vaonu ja sääl võetas keelumärkega massinil huug maaha. Otsustõdu om, et joba vahtsõl aastal lätt tii silla mant remonti. Nii lätt, et ku ei võeta aigu, et asja kõrraligult tetä, sõs perän tulõ võtta lisaaigu, et asi ümbre tetä.
Aknide vahetusõ tugõmise programm om käivitet, aga taotlusi om kõvastõ inämb kui noid kiä api vajasõ. Ligi 300 taotlusõst saa novembrilõpu saisuga tukõ nii 90 taotlust, nuu’ kiä omma lähembäl väljaku piirile kui 1900 meetrit. Taotluisil om vajja paranda viku, dokumente mano otsi. Mis saa noist vanust kiä maja latsi nime pääle kirotanu, a esi eläse maal ja latsõ’ liinan? Tull vällä, et säändsit om.
Kõigil kuuholõkil olõmi esitanu palvõ kujul nõudmise, et aknide vahetust tulõ ka edaspidi tugõda ja pallõldu tuu kohegi kaitsõkulutuisi programmi lisada. „Vahendeid ei ole piisavalt, kuid selliste toetusskeemide järele on vajadus, et parandada elukvaliteeti piirkonnas“, om kirän protokollin. Ja Allasõ Antti: Toetusi tuleb ette näha pikaajaliselt. Kõik, kes piirkonnas elavad, peaksid mürahäiringutoetuse saama, sõltumata omandistaatusest.“
Nursipalu harjutusvällä laiendamise avalik arutelu 25.11.2024 Kandlõ kultuurimajan oll võropuulsõtõ komisjoniliikmide arvatõn läbikukkumine. Kohalikõl umavalitsuisil es olõ kõrdapiten infot inne kuuholõkit. Kuuba Rainer ütel, et kommunikatsioon ja suhtekõrraldus olli alla egäsugust arvõstust. Koosolek oll kehväste juhit. Kauksi Ülle murõht inimesi halva kohtlõmise ja üleoleva suhtumise üle kuuholõkidel. Tõi esile Võromaa tühjenemise ja kultuurilise kaotusõ probleemi ni kutsõ üles kuuhtüüle ja Võromaa elu säilitämisele. Liinapää Kõva Kalvi ütel, et Kaitsõväe massina omma’ surnuaia kõrval pargitu nii, et inemise’ saa-’i leinamassinid kohegi parki. Kaitsõvägi piät esi umma parkimisplatsi ehitämä ja hooldama.
Järgmine kuuholõk tulõ Talinan ja loodetavasti näemi ka kaitsõministret hinnäst, seni olõõi täl seo komisjoni istungidest aigu olnu’ ossa võtta. Olõmi egä kõrd tennü ka ettepaneku laienda seod kuuhtüüvormi Valitsusõ Komisjonis nii, et ossa võtnu pääle Kaitsõministeeriumi ka Kliima-, Majandus ja Kultuuriministeeriumõ esindäjä’, et Õuroopa Liidu ja Eesti ni -Ukraina kaitsmisele lisas saanu’ edesi kesta ka võrokõisi põlisrahvas, aga ministrile ei ollõv tuu mõtõ’ miildünü. Paremb olnu kõigilõ, ku nakanu miildümä.
– Kauksi Ülle